Ndeshja e fundit e javës së 18-të të Premier League është kthyer në një festival golash. Tottenham ka mposhtur 6-2 Everton në Goodison Park dhe tani ndodhet në vend të tretë, vetëm dy pikë larg Manchester City-t.
Ishin vendasit ata që e nisën mirë duke kaluar të parët në avantazh me Walcott. Por me kalimin e minutave Tottenham e mori veten dhe Son barazoi, përpara se Dele Alli të përmbyste rezultatin në minutën e 35’. Harry Kane, i cili kishte shpërdoruar shumë mundësi deri në atë moment, shënon golin e tretë pak minuta përpara përfundimit të pjesës së parë.
Pas pushimit ishte Eriksen me një goditje fantastike nga distanca që shënon golin e katërt dhe të sigurisë për miqtë. Gjithsesi, pak minuta më pas Sigurdsson i jep një fije shpresë Everton me golin e tij të mrekullueshëm. Por dy golat ë shpejtë të Tottenham vulosën fitoren fantastike të londinezëve.
Ishin përsëri Son dhe Kane që fundosën Everton brenda. Me golin e dytë, Harry Kane është bërë lojtari i dytë që pas Michael Owen, i ashtuquajturi “Golden Boy” i Anglisë, që shënon 2+ gola në katër ndeshje radhazi ndaj një kundërshtari të vetëm. Oden e kishte bërë ndaj Newcastle nga gushti i 1998 deri në majin e 2001.