Duket se rezultatet e fundit të ekipit të Lacios nuk i kanë pëlqyer aspak drejtorit sportiv Igli Tare. Ndryshe nga sezoni i kaluar, Lacio ka humbur “shkëlqimin” e saj në këtë sezon. Tre barazime në ndeshjet e fundit në kampionat janë vulosur nga humbja e fundit në UEFA Europa Ligë ndaj Apollonit në Qipro.
Duket se ekipi roman nuk po gjen dot veten e vet pas barazimit me Kievon në kampionat. Një futboll jo zbavitës, jo i shpejtë dhe jo me shumë raste për shënim janë ato çfarë ekipi i sivjetshëm i Inzagit ka prodhuar.
Taktika e trajnerit me tre mbrojtës nuk po funksionon aspak mirë dhe klubi ka vendosur që t’i marri të gjithë në grumbullim deri në ndeshjen kundër Sampdorias të shtunën, në kampionat. Ndryshimi i taktikës në mbrojtje mund të jetë çelësi. Lacio pret të kthehen nga rikuperimi dyshja e mesfushës, Luis Alberto dhe Lukas Leiva, ndërsa këtë vit vetëm Açerbi dhe Korrera kanë bërë mirë për ekipin nga blerjet e reja.
