Futboll Premier League Sport

LIVERPOOLI I KOMPLETUAR/ Sekreti qëndron te mbrojtësi më i mirë në botë

Liverpool do të jetë në krye të Premier League për Krishtlindje, pas tre pikësh të tjera marrë në Molineux, fitorja e shtatë rresht në kampionat për The Reds, që shtojnë presionin mbi Manchester City-n.

Nuk ishte një ndeshje fantastike, për shkak të rrebeshit, por Salah e Van Dijk shënuan dy gola të bukur dhe skuadra e Jurgen Klopp nuk pësoi gol për të 11-tën ndeshje këtë kampionat. “Një paraqitje plot pjekuri”, tha Klopp pas ndeshjes dhe nuk e kishte gabim.

Ndeshja u vendos nga dy lojtarët më të mirë në fushë dhe nëse nuk e keni kuptuar ende, The Reds po kthehen në një skuadër të vërtetë, të kompletuar dhe me vetëdijen se mund të fitojë ndaj çdo rivali, duke u mbështetur edhe te dy yje të klasit botëror si Salah e Van Dijk.

Salah është tashmë një superstar, nuk ka nevojë të shkruhet pa fund për cilësitë dhe shifrat e tij impresionuese. Mund të flitet shumë më tepër për paraqitjen perfekte të Van Dijk, i cili në këtë moment nuk ka rival në planet, në rolin e tij.

Është 27 vjeç, në janar 2018 u ble për 84 milionë euro nga Southampton dhe tashmë kushdo që rrudhte buzët për atë shifër ka ndryshuar mendim. Jo vetëm kaq, por tashmë të gjithë e shohin qartë se Van Dijk bën repart i vetëm dhe ka ndryshuar gjithçka te Liverpol.

Një legjendë e Liverpool-it, Jamie Carragher, tha pas ndeshjes kundër Wolves: “Van Dijk i bën lojtarët rreth tij që të luajnë më mirë. Tony Adams i bënte mbrojtësit e Arsenalit të dukeshin yje, Van Dijk bën të njëjtën gjë”.

Ndërkaq, Jordan Henderson tregon çfarë ka ndryshuar tek Liverpool në krahasim me vitet e fundit: “Në sezonin 13/14 dolëm të dytët, por diferenca është te ndeshjet pa pësuar gol. Atëherë ne pësonim shumë gola, tani po i mbyllim ndeshjet pa pësuar, po mbrojmë shumë mirë si skuadër dhe Van Dijk e Alisson kanë përmirësuar ndjeshëm lojën mbrojtëse”.

Liverpool ka bërë disa blerje të mira vitet e fundit, por askush nuk ka pasur efektine Van Dijk, sepse deri vjet mbrojtja e Liverpool-it ishte shpesh objekt humori, me mbrojtësit e saj të çoroditur. Ka momente sikur gjithçka duket tepër e thjeshtë për Van Dijk: dominues në zonën e tij, nisje të aksionit sulmues, sprint për të treguar se mund të mposhtë edhe lojtarin më të shpejtë të kampionatit (Adama Traore), gola me peshë të jashtëzakonshme, për klubin e kombëtaren.

Me një Van Dijk në formë të tillë dhe me sulmin e frikshëm ku natyrisht spikat Salah, kush mund ta ndalë këtë Liverpool?

Related posts

Neymar e ka vendosur, mbyllet këtu aventura me Paris SG

Q.Autor

PAS DISFATËS SË ATALANTËS/ Ja si vlerësohet nga media italiane mbrojtësi i Kombëtares

Delo.autor

Forma fantastike e CHELSEA/ Ja sekretet e Sarrit. Riktheu KEÇAPIN në tavolina dhe…

Isa.Autor

Leave a Comment