Përkundër thashethemeve të vazhdueshme se Neymar mund të largohet nga Franca, lidhja e anësorit brazilian me klubin e tij Paris Saint-Germain është bërë edhe më e fortë, pasi lojtari është bërë ambasadori i ri global i Bankës Kombëtare të Katarit (QNB).
Marrëveshja garanton se të gjitha të drejtat e marketingut të Neymarit tani janë të bankës dhe babai i lojtarit e ka vënë firmën e tij në kontratë bashkë me Yousef Darwish, menaxherin e përgjithshëm të QNB communication group.
QNB-ja është ndër sponsorët kryesorë të gjigantit parisien, ndërsa inicialet e saj zënë vend në mëngët e fanellës së PSG-së.
Drejtuesit e PSG-së shpresojnë se zhvillimet e fundit do t’i japin fund thashethemeve për largimin e Neymarit, të paktën për një kohë, dhe braziliani të përqendrohet dhe t’i ndihmojë skuadrës të kalojë në fazën e eliminimit direkt në Ligën e Kampionëve.
