Nuk kishte më asnjë dyshim, por tani ka ardhur zyrtarizimi. Ivan Gazidis bëhet drejtori i ri efektiv i Milanit, detyrë të cilën është kontraktuar për ta bërë deri në vitin 2020. Ish-menaxheri i Arsenalit ndodhej në Milanello ditët e fundit, i shoqëruar nga Leonardo dhe Maldini. Kësisoji, në fakt aventura e tij me kuqezinjtë kishte filluar.
Në asamblenë e anëtarëve të klubit, e mbajtur mëngjesin e sotëm, pritej vetëm njoftimi, i cili arriti në kohë. Gazidis është shtuar si anëtar i ri i Bordit të Drejtorëve të Milanit, numri i të cilëve kalon nga tetë në nëntë.
Samiti, në prani të 26 aksionarëve (mungonte Franck Tuil, menaxher i “Elliott” dhe një pjesë e Bordit), gjithashtu vëzhgoi modifikimin e disa neneve të Statutit të Milanit, i hartuar më herët, në projektin e vjetër të Li Yonghong.