Juventusi e ka mposhtur Romën 1-0 në kryendeshjen e javës të shtunën në Torino, duke e ruajtur ecurinë e përkryer pa humbje në Serie A.
Kampioni në fuqi regjistroi fitoren e tetë radhazi pasi e mundi Romën 1-0 në “Allianz Stadium”, dhe e forcoi edhe më shumë epërsinë në krye të renditjes tabelore në ligën elitare italiane.
Pas 17 xhirosh, Genoa është skuadra e vetme që ia ka dalë t’i marrë pikë Juves, kur e ndali me barazim 1-1 para tetë javësh.
Kjo është ndeshja e gjashtë më radhë që “Zonja e Vjetër” e ruan portën e paprekur në ligë.
Juves iu deshën 35 minuta për ta thyer akullin, kur sulmuesi kroat Mario Mandzukic realizoi me kokë për 1-0.
Në një ndeshje fantastike por të kontrolluar nga vendasit, që edhe krijuan më shumë raste dhe patën më tepër goditje në drejtim të portës kundërshtare, Roma ishte e pafuqishme të shënonte.
Juventusi shënoi edhe një herë në minutën e fundit të kohës së rregullt, por goli i Diego Costas u vlerësuar i parregullt nga VAR-i.
Kampioni aktual Juventusi renditet i pari dhe i ka grumbulluar 49 pikë nga 51 të mundshme, një ecuri e përkryer rezultatesh.
Roma mbetet në vendin e 10 me 24 pikë.
