“AIR ALBANIA” KTHEHET NË MAKTH/ Partizani merr vendimin drastik, ja ku do të luajë ndaj “Durrsakëve” (FOTO)

Partizani në kërkim të rrugëdaljes, pas humbjes së turpshme në derbin e madh të kryeqytetit (5-1). Të mërkurën, skuadra e Sormanit duhet të sfidojë Teutën, në kuadrin e javës së 25-të të Superiores. Kampionët kanë humbur terren në raport me kreun, por nuk pranojnë të dorëzohen për titullin. Kuptohet, kjo shpresë ushqehet vetëm me fitore në vazhdim, duke shpresuar që bardheblutë e të tjerët të gabojnë në pjesën e mbetur të kampionatit. Kthesa duhet të jetë bindëse dhe e menjëhershme, duke nisur nga përballja me Teutën.

Drejtuesit e “demave” duket se e shohin “Air Albania Stadium” si të mallkuar për ta, sepse në tri ndeshje aty nuk kanë fituar asnjë herë (dy humbje me Tiranën dhe një barazim me Bylis), ndaj kanë vendosur të luajnë në “Selman Stermasi”. Më konkretisht, më 4 mars, prej orës 17:00, Partizani do të sfidojë durrsakët në shtëpinë e Tiranës, aty ku është bujtës si pritës që prej edicionit të kaluar. Një “kostum” i vogël, në dukje, por që duket se i rri mirë për shtat Partizanit të… emrit të madh. Ky aktuali, edhe pse kampion në fuqi, ka treguar pak për emrin, historinë, investimin dhe pretendimet, duke i zhgënjyer tifozët e kuq.