Manchester City gati të nisë shkëputjen në krye të Premier League-s teksa këtë të martë, në orën 21:00, do të zbresin në fushën e Watfordit për ndeshjen e javës së 15-të të kampionatit anglez. Me 38 pikë në total, 2 më shumë se Liverpooli, kampionët në fuqi synojnë të krijojnë një distancë sigurie me ndjekësit më të afërt, sigurisht duke shpresuar që ekipi i Jurgen Klopp të “ngecë” në fushën e Burnley-t.
Citizens synojnë të përfitojnë edhe nga forma e dobët e Watfordit, që në katër ndeshjet e fundit kanë marrë vetëm një pikë, në barazimin 1-1 në fushën e Southamptonit.
Manchester City, edhe pse ka lënë 4 pikë në këtë sezon në ndeshjet jashtë, nuk humbet në transfertë që nga muaji janar, duke koleksionuar 10 fitore e 3 barazime.
Përveç Kevin De Bruyne që mungn prej shumë kohësh për arsye dëmtimi, në dyshim për City-n është edhe Sergio Aguero. Gjithsesi, në këtë sezon ka shkëlqyer Raheem Sterling me 8 gola e 6 asiste në 12 ndeshje ku është aktivizuar në këtë sezon. Ky takim do të transmetohet drejtpërdrejt në orën 21:00, në Supersport 2.
Po mbrëmjen e kësaj të martë në Premier League do të luhet edhe 3 takime të tjera në orën 20:45, Bournemouth – Huddersfield, Brighton – Crystal Palace dhe West Ham-Cardiff.
