Maurizio Sarri duket i dorëzuar. Ai ka thënë se Chelsea nuk do të jetë sfidues për titullin në Premier League, këtë sezon. Megjithatë, tani është bërë mjaft e qartë se edhe renditja në “top 4” nuk është aspak e sigurtë.
“Mendësia e çuditshme”, që Sarri e ka deklaruar në mënyrë të përsëritur, ka qenë e ekspozuar për të gjithë, para së gjithash ndaj Tottenhamit, javën e kaluar, dhe mbrëmë ndaj Wolves, në humbjen 2-1.
Blutë e Londrës dominuan pjesën më të madhe të lojës, por mbetën pa asgjë në fund.“Mendoj se kemi luajtur shumë mirë për 55 minuta, – u tha Sarri gazetarëve. – Pas golit të parë, në rezultatin 1-1, ishte një aksident, sepse e kishim në kontroll të plotë ndeshjen. Ne ishim papritmas një ekip tjetër, pa distancat e duhura, pa futbollin tonë, nuk e di pse.
Unë jam shumë i shqetësuar, jo për rezultatin, por për faktin që nuk kemi reaguar ndaj pësimit të golit të parë. Ne nuk reaguam aspak, prandaj jam shumë i shqetësuar për këtë”.
