Presioni mbi PSG-në sa vjen e rritet, për shkak të rregullave të Fair-play financiar, që duhen respektuar patjetër dhe UEFA nuk do të tolerojë.
Neymar kushtoi 222 milionë euro dhe Mbappe 180 milionë, shifra që kanë prishur totalisht balancat në llogaritë e klubit francez.
Për këtë arsye, tashmë kampionët e Ligue 1 mund të detyrohen të marrin një vendim shumë të dhimbshëm – të shesin një nga dy yjet e vet, për të rregulluar bilancin.
Mediapart raporton se PSG duhet të arkëtojë urgjentisht 190 milionë euro, për të qetësuar UEFA-n, e cila ka kohë që po heton dhe tashmë është nën presion të madh nga mediat, ndaj mund të shkojë deri aty sa ta përjashtojë PSG-në nga kupat e Europës, nëse nuk merr sinjalin që pret.
Që në vitin 2014 PSG u dënua nga UEFA, por me një gjobë të lehtë, ndërsa tashmë hetimet kanë rinisur, për shkak të fakteve të reja, zbuluar nga Football Leaks, ku ndër të tjera dalin në dritë kontrata me organizata nga Katari, që në fakt janë të gjitha pronë e pronarëve të PSG-së.
