Milan dhe Napoli kanë ndarë nga një pikë në supersfidën e javës së 21-të të Serie A.
San Siro i mbushur plotë nuk e meritonte këtë barazim pa gola 0-0, gjithsesi ky është një rezultat i mirë për vendasit të cilët i kishin humbur katër ndeshjet e fundit ndaj napolitanëve.
Megjithatë mundësitë e krijuara, sidomos në pjesën e dytë, nuk janë shfrytëzuar nga lojtarët e Milan dhe Napolit.
Për vendasit ishte Musacchio ai që nga shumë pranë portës kundërshtare goditi keq. Ndërsa për miqtë Zielinski mund të kishte shënuar golin e fitores, por edhe ai u tregua i pasaktë.
Me këtë barazim, Napoli mbetet i qetë në vendin e dytë, ndërsa Milan për momentin do të qëndrojë në vend të katërt, por një fitore e Roma-s ose e Lazio-s do t’i zbriste poshtë zonës së Champions.
Sot debutoi edhe sulmuesi i ri i Milan, Piatek, i cili u zëvendësua në fund të takimit, por ai nuk arriti të kishte asnjë ndikim në ndeshje.