Dy klubet më të forta në planet, dy histori që përballen në Spanjë, dy shtëpi futbolli që kërkojnë trashëgiminë të vijojë përgjithmonë. “El Classico” e mirënjohur në të gjithë botën humbi pak nga shkëlqimi i saj këtë sezon me largimin e Cristiano Ronaldos nga Madridi, por të dy klubet po sigurohen që të kenë yjet më të mëdhenj të globit në të ardhmen.
Goditjet e fundit në merkato nga Real Madrid dhe Barcelona kanë vërtetuar projektin e tyre afatgjatë. Në blerjet e tyre deri tani janë llogaritur shpenzimet dh rezulton se katalanasit kanë shpenzuar më shumë se madrilenët: 252 milionë euro, plus 60 bonuse – 137 milionë euro, plus 11 bonuse.
Ja yjet që do përballen në “El Classicon” e famshme në pak vite:
Barcelona ka krijuar një listë me gjatë me lojtarë të rinj, plot 7 lojtarë që janë nën 22 vjeç dhe premtojnë një të ardhme të madhe. Katalanasit kanë blerë 5 lojtarë, ndërsa 2 të tjera kanë dalë nga akademia e tyre “La Masia”.
Ousmane Dembel, 21 vjeç – një blerje e dëshpëruar nga largimi i Neymar. Francezi ka treguar cilësi në fushë, por mangësi jashtë saj, gjithsesi mosha e tij jep shpresë të madhe.
Frenkie De Jong, 21 vjeç – një lojtar i kërkuar me ngulm nga Barcelona. Konkurrenca e detyroi të lëvizë që në merkaton e janarit dhe e morën në bord. Deri tani, lojtari ka shkëlqyer me Ajaxin në Holandë.
Malcom, 21 vjeç – Një afrim i bujshëm, të cilin ia rrëmbyen Romës. Gjithsesi braziliani nuk ia ka dalë të tregojë ende vlerat e tij dhe një huazim deri në verë shikohet si opsion, pasi minutat për të janë me pikatore.
Arthur, 22 vjeç – Duket sikur ka dalë nga akademia e Barcelonës. Padyshim blerja më e goditur. I ardhur nga Gremio, braziliani ia ka dalë të përshtatet më së miri me lojën e katalanasve dhe të gjithë shohin tek ai një Xavi të së ardhmes.
Alena, – 21 vjeç – Një nga prodhimet më të mira të akademisë. I konfirmuar në fushë me ekipin e parë. Golat nuk janë një problem me të, madje ka zhvilluar ndeshje të mëdha edhe në Champions League.
Riqui Puiq, 19 vjeç – Talenti vijon të aktivizohet me ekipin B të Barcelonës, por paraqitjet e tij me ekipin e parë kanë qenë mbresëlënëse. Teknika, shkathtësia dhe saktësia e tij premtojnë shumë.
Ballou Tabla, 19 vjeç – I lindur në Kanada, i rënë në sy te Montreal Impact, Barcelona nuk u ndal për të firmosur me talentin e MLS dhe në verën e kaluar e sollën në “Camp Nou”.
Real Madrid është klubi që ka bërë më shumë lëvizje për të rinjtë, pavarësisht se shifrat e shpenzuar janë sa gjysma e Barcelonës. Me vetëm një lojtarë të dalë nga akademia dhe 8 të tjerë të blerë nëpër klube, Perez ka ditur të investojë.
Marco Asensio, 23 vjeç – Spanjolli do të mbahet mend si blerja më e mirë nga Real Madrid. I afruar nga Mallorca për vetëm 4 milionë euro dhe tani vlera e tij në treg është 100 mln euro edhe pse ka patur rënie të ndjeshme të lojës së tij.
Ceballos, 22 vjeç – Andaluziani përfaqëson më së miri politikën e Real Madrid në nënshkrimin e lojtarëve. Pagoi 16 milionë euro te Betis sezonin e kaluar dhe ia ka dalë të sigurojë një vend në ekipin e parë, madje edhe në ekipin kombëtar të Spanjës.
Martin Odeaard, 20 vjeç – Një blerje e padëgjuar më parë. Vetëm 16 vjeç dhe Real Madrid hapi thesin për të. Fillimisht u vërtit mes ekipin të parë dhe më pas te Castilla, për t’u huazuar te Vitesse në Holandë, aty ku këtë sezon ka shpërthyer dhe ka marrë pjekurinë e duhur.
Vinicius Junior, 18 vjeç – I blerë këtë verë nga Flamengo për 45 milionë euro. Djaloshi brazilian mbërriti në Madrid dhe e filloi me ekipin B përvojën e tij, por me emërimin e Solarit në krye të Real Madritit, ai u grumbullua në ekipin e parë dhe ia ka dalë të sigurojë një vend titullari, duke treguar vlera të larta ndeshje pas ndeshje.
Rodrygo, 18 vjeç – 45 milionë euro për një tjetër diamant në Brazil. Lojtari vijon të luajë me Santos, por do të mbërrij në Spanjë verën e ardhshme. Ndërkohë në muajt e fundit konkurroi me Mbappe për trofeun Kopa për të rinj.
Brahim Diaz, 19 vjeç – Kjo goditje ishte perla e fundit nga Florentino Perez. 17 milionë euro, plus 7 bonuse për një lojtar të pakonfirmuar në nivel elitar. Gjithsesi vlerat e tij i ka treguar dhe dëshira e Guardiolës për ta mbajtur te Manchester City tregon cilësitë e tij.
Andriy Lunin, 19 vjeç – Portieri ukrainas mbërriti në Madrid për 8.5 milionë euro, duke mposhtur konkurrencën e ekipeve si Liverpool, Inter e Roma. Mbipopullimi me portierë e detyruan klubin ta huazojë te Leganes, por edhe atje nuk ka marrë minutat e duhura në dispozicion.
Sergio Reguilon, 22 vjeç – Forma e dobët e Marcelos i ka dhënë atij shansin për të luajtur dhe e ka bërë krahun e majtë një ndër pikat më të forta të Realit të Solarit.
??? Militao, 21 vjeç – Qendërmbrojtësi është shumë pranë firmës me Real Madrid për 50 milionë euro dhe lojtari kalon nga Porto në Madrid në qershor.
