Ernesto Valverde është i bindur se gjyqtarët kanë marrë vendimin e duhur në lejimin e golit të Luis Suarez, në fitoren 3-1 kundër Leganes, pavarësisht kontestimeve të kësaj të fundit.
Leganes e intrigoi ndeshjen në “Camp Nou”, kur Martin Braithwaite barazoi (1-1) golin e Ousmane Dembele. Kjo e detyroi Valverde të hedhë në fushë Lionel Messin nga stoli. Dhe argjentinasi e frymëzoi Barçën, që të fitonte, duke luajtur një rol në golin e Suarez, para se t’i vuloste gjërat vetë më vonë.
Goli i Suarez ishte i diskutueshëm nga këndvështrimi i Leganes, pasi Ivan Cuellar e shpëtoi goditjen e Messit dhe pastaj uruguajani shënoi në një zonë të ngushtë, duke u ndeshur me portierin në të njëjtën kohë.
Përsëritja e rastit tregoi që, edhe pse ka pasur kontakt, ai ishte minimal dhe goli mbeti në fuqi, edhe pas shqyrtimit me VAR. Kjo e zemëroi fort Leganes.
Megjithatë, Valverde mendon se goli ishte i rregullt. “Që në fillim mendova se ishte gol, – tha Valverde për “Movistar”. – Çfarë mund të them, të gjithë e shohin atë nga këndvështrimi i tyre, por nëse arbitri e ka dhënë, do të ketë qenë patjetër gol.
Me VAR, polemikat duhet të mbarojnë, ishte një gol i qartë. Suarez nuk e preku portierin, gjyqtarët e kanë parë këtë. Do të ketë gjithnjë polemika, edhe gabime do të bëhen. Gabimet nuk do të përfundojnë me VAR, as nëse vihet një arbitër robot”.
