Marouanne Fellaini ka nisur bisedimet për një transferim multi-milionë euro nga Manchester United në Lindjen e Largët.
Sipas burimeve kineze, Fellaini është duke biseduar me disa klube të Super League kineze, ndër to edhe Shandong Luneng Taishan, që u rendit në vend të tretë sezonin e kaluar dhe ka lojtarë si Graziano Pelle, italiani që ka luajtur te Southampton.
Mesfushori 31-vjeçar pritet t’i bashkohet Shandong, që është cilësuar nga Forbes si klubi më i pasur kinez.
Me bazë në Jinan të Kinën lindore, stadiumi i klubit është Jinan Olympic Sports Center dhe ka një kapacitet prej 56,808 vendeve.
Kinezët thuhet të kenë dërguar një delegacion për të arritur marrëveshjen me drejtuesit e Man United.
Merkato e kampionatit kinez hapet më 28 shkurt. Fellaini ishte një lojtar i rëndësishëm nën drejtimin e Jose Mourinho-s, por pas ardhjes së Ole Gunnar Solskjaer, ai është kthyer në një ngrohës stoli.
Ai nuk është pjesë e skuadrës për shkak të një dëmtimi muskulor që do ta mbajë larg fushave për rreth tre javë.
