Një nga legjendat e Milanit, Andriy Shevchenko, ka dhënë një intervistë në Itali, ku natyrisht temë kryesore ka qenë klubi kuqezi.
Trajneri aktual i Ukrainës flet për problemet që po has Milani, në fushë e jashtë saj, ndërsa komenton edhe krizën e Gonzalo Higuain.
“Synimi i Milanit është të shkojë në Champions League dhe po luftojnë, janë shumë pranë dhe uroj të kthehen, sepse ai është vendi i Milanit që mbaj mend. Ky Milan është një projekt, duhet të ndërtohet me qetësi dhe të kthehet pak nga pak në majë, fillimisht në Itali e më pas në Europë. Duhet kohë e durim, por renditja e mirë ndihmon shumë. Edhe dëmtimet kanë ndikuar shumë, sepse skuadra nuk ka ndonjë stol të pasur dhe kur mungojnë disa titullarë rendimenti bie dukshëm”.
Për Higuain: “Ka shumë presion mbi të dhe nuk ka pasur as fatin me vete. I referohem penalltisë që gjuajti kundër Juventusit: disa gola të ndryshojnë jetën. Është një lojtar që e di që po luan të ardhmen e vet, nëse Milani shkon në Champions mund të qëndrojë dhe duket qartë që Gonzalo dëshiron të qëndrojë. Thjesht duhet të ruajë qetësinë në momente të vështira, sepse ato kalojnë”.
Superkupa Milan-Juve: “Juventusi është skuadra më e fortë e kampionatit, është e pamendueshme që një klub tjetër ta vërë në vështirësi, por në një ndeshje teke nuk i dihet”.
Gattuso: “I drejtë konfirmimi i tij, klubi i ka idetë të qarta, nuk lëkundet lehtë. Leonardo e Maldini po punojnë me kompetencë, nuk është e lehtë të kthehesh në majë duke punuar vetëm me huazime. Të shohim si do shkojë apeli në CAS kundër dënimeve të UEFA-s”.
E ardhmja e Shevës: “Tani kam vetëm një dëshirë: të çoj Ukrainën në Euro 2020. Jemi në rrugën e duhur, por ka ende shumë punë përpara”.
