Pas debutimit me fanellën e Chelsea në FA Cup sulmuesi argjentinas Gonzalo Higuain pritet të debutojë të mërkurën edhe në Premier League. Trajneri Maurizio Sarri ka mbetur i kënaqur nga ndeshja e parë e Higuain me “blues”, duke e vlerësuar edhe gjestin e sulmuesit për të mos e goditur penalltinë edhe pse Willian i tha ta gjuajë atë.
“Mbeta pak i habitur nga ai veprim i Gonzalo, pasi e njoh dhe është një lojtar që dëshiron të shënojë në çdo ndeshje. Por e vlerësoj faktin që ia dha topin Willian. Për mua ishte një start i mirë i sulmuesit me fanellën e Chelsea, që tregon se është i gatshëm të ndihmojë skuadrën”, tha Sarri.
Gjithsesi, trajneri italian ka një këshillë për sulmuesin 31-vjeçar, që tani do të nisë një aventurë të re. “Duhet të vrapojë më shumë në fushë, pasi Premier është një kampionat shumë fizik, ku loja ndryshon shumë shpejt kah dhe ritëm. Nëse i duhet të përshtatet këtij kampionati dhe nëse dëshiron të shënojë sa më shumë e këshilloj të vrapojë sa më shumë në fushë, për të qenë në të njëjtin ritëm me skuadrën”, tha Sarri.
