Zinedine Zidane është larguar nga Real Madrid pasi humbi betejën për pushtetin e transferimeve me Florentino Perez, sipas ish-presidentit të klubit Ramon Calderon.
Zidane la Real në fund të sezonit të kaluar, pasi fitoi trofeun e tretë radhazi të Champions League si trajneri i Los Blancos.
Disa javë më pas është larguar edhe Cristiano Ronaldo, i cili i dha fund ecurisë 9-vjeçare te Real për t’iu bashkuar Juventus-it.
Dhe Calderon pretendon se Zidane donte që Ronaldo të qëndronte dhe në vend të tij të shiste Gareth Bale, duke shtuar se arsyeja pse francezi u largua nga Madridi ishte për shkak të mosmarrëveshjeve me Perez për politikën që duhej ndjekur për transferimet.
“Zidane ka insistuar për të mbajtur Ronaldo-n dhe të shiste Bale,” shprehet Calderon për spanjollen AS.
“Perez bëri të kundërtën e asaj që kërkoi Zidane. Trajneri donte të ishte ai që merrte vendimet për blerjet e disa lojtarëve dhe shitjen e disa të tjerëve, por kërkesat nuk i janë plotësuar.
“Kështu që vendosi të largohej. Dhe kishte të drejtë.”
