Real Madrid ka probleme me shënimin e golave? Zgjidhja quhet Sergio Ramos. Absurde? Jo dhe aq, veçanërisht nëse merret parasysh fakti se kapiteni është pothuajse golashënuesi më i mirë i skuadrës. Nëntë gola, me vetëm Benzema (13) dhe Bale (10) që janë para tij, por këta dy të fundit paguhen për të shënuar.
Qendërmbrojtësi i “Los Blancos” duket se po jeton një rini të dytë, veçanërisht para portës. Dy golat që kanë kontribuar në fitoren 4-2 të marrë nga Real Madrid kundër Girona-s në Kupën e Mbretit e tregojnë qartë këtë. I pari ka ardhur me specialitetin e tij, penallti me stilin Paneneka, i dyti me kokë pas një depërtimi të denjë për një qendërsulmues.
Një gol që ka bindur edhe trajnerin Solari: Ramos mund të luajë kudo, edhe si sulmues. “Sergio Ramos si numër 9? Është një zgjidhje që duhet marrë parasysh. Ai është një luftëtar, një lider. E tregon këtë në mbrojtje dhe në zonën e rreptësisë kundërshtare, si në rastin e golit të dytë”.
Me pak fjalë, Benzema do të bëjë mirë të ruhet nga kapiteni i tij. Në fakt, duke parë se Mariano Diaz ka akoma probleme në kurriz, rivali numër një i francezit në sulm mund të jetë pikërisht Ramos.
