Napoli i ka mbyllur çdo mundësi PSG-së për të marrë shërbimet e mesfushorit Allan. Një gjë të tillë e konfirmoi edhe sot trajneri Carlo Ancelotti, i cili tha se braziliani nuk do të largohet nga Seria A.
Në këtë situatë drejtuesit e PSG kanë hyrë në kontakt të thelluar me Zenit, me të cilët ka gjetur akordin për të marrë shërbimet e Leandro Paredes. Fillimisht, mesfushori argjentinas u kërkua me ngulm nga Chelsea, por oferta prej 34 milionë euro u refuzua nga klubi rus.
Për këtë, kampionët e Francës u detyruan të rrisin ofertën dhe ta çojnë në shumën e 40 milionë eurove që shkojnë menjëherë në arkën e Zenit, dhe 5 të tjera që do të jenë në formën e bonuseve.
Një shpenzim goxha i lartë për një lojtar që u largua nga Italia për në Rusi dhe nuk ka qenë në nivelin ku të gjithë presin, apo të justifikojë shumën që po shpenzohet për të. Aq me tepër që vlera e tij në Transfermarket llogaritet në 25 milionë euro.
