Tirana e nisi me fitore fazën e tretë në Kategorinë Superiore. Përballë Kamzës, në sfidën e javës së 19-të, zhvilluar në shtëpi, ekipi i Memës fitoi me shifrat e thella 4-1, edhe pse jo pa vështirësi.
Pjesa e parë u mbyll në disavantazh, pasi Plaku çoi në avantazh të tijtë në minutën e 31-të, pasi i mori kohën Imamit, dhe mposhti Abibin me një goditje të fortë nga jashtë zone.
Bardheblutë reaguan, dhe në minutën e 39-të, fituan një penallti, ku edhe Beqiri doli me të kuq, pasi u ndëshkua me të dytin të verdhë. Por, nga 11-metra Avdyli priti përballë Ngos.
Gjithsesi, në fraksionin e dytë, Tirana u fut e vendosur në fushë, dhe ia doli të përmbyste. Hasani gjeti golin e barazimit në minutën e 59-të, pas një asistimi fantastik nga Ngo.
Gjithçka u përmbys në minutën e 67-të, pasi Ngo, shleu penalltinë e humbur, dhe shënoi me kokë, pas një harkimi nga Hasani nga goditja e këndit, që në një farë mënyre i shleu borxhin e golit të parë.
Në minutën e 74-t, Ngo bëri përsëri gjithçka mirë me topin e marrë në mesfushë, dhe nxorri sërish vetëm Hasanin me Avdylin, dhe shkodrani nuk fali. “Pokerin” e golave e plotësoi Doka, i cili me kokë shënoi golin e parë sezonal, pas harkimit të Hoxhallarit.
Me këtë fitore, Tirana shkon në kuotën e 20 pikëve në vendin e shtatë, ndërsa Kamza mbetet e parafundit, me 15 pikë.
Tirana-Kamza 4-1
GOL: Hasani 59′, 74′, Ngo 67′, Doka 76 / Plaku 31′
Karton i Kuq: Beqiri 39′