Trajneri i Liverpoolit, Jurgen Klopp, është akuzuar se i ka udhëzuar stafin e mirëmbajtjes së stadiumit të pastrohet vetëm një pjesë e fushës në Anfield, mbrëmë.
Pas përfundimit të pjesës së parë, Kloppi kishte kërkuar që të pastrohej vetëm ajo pjesë e fushës në të cilën do të sulmonte Liverpooli gjatë pjesës së dytë. Ndërsa, pjesa tjetër e fushës mbeti e mbuluar me borë në disa vende.
Megjithatë, kjo taktikë i dështoi trajnerit gjerman, pasi që skuadra e tij nuk arriti ta fitojë ndeshjen e mbrëmshme, në kuadër të Premierligës, kundër Leicesterit. Ndeshja përfundoi me rezultat 1-1.
Fillimisht, djemtë e Jurgen Kloppit kishin qenë në epërsi përmes golit të shënuar nga Sadio Mane, megjithatë ndeshja përfundoi me rezultat 1-1, pasi që qendërmbrojtësi Harry Maguire arriti ta shënojë një gol për Leicesterin.
Pika e fituar nga kjo ndeshje e shton distancën mes Manchester Cityt dhe Liverpoolit, mirëpo Klopp dhe tifozët në Anfield mbetën të zhgënjyer që nuk e shfrytëzuan plotësisht dhuratën e Pep Guardiolës, i cili kishte pësuar disfatë një ditë më parë.
