Deklaratat kontraverse të agjentës së Mauro Icardit, Wanda Nara duket se kanë turbulluar ujërat në shtëpinë e Interit.
Drejtuesit zikaltër janë përballë një presioni të vazhdueshëm nga agjentja e kapitenit të tyre, dhe fundi i sezonit aktual mund të jetë ai i “divorcit” mes palëve. Një gjë e tillë është nuhatur edhe nga ish-sulmuesi i Interit, Antonio Cassano, i cili ka pohuar se drejtuesit zikaltër duhet ta shesin një orë e më parë Icardin.
“Nëse Icardi dëshiron të largohet, lamtumirë! E nëse do të kisha një shkop magjik, do ta merrja Higuain nga Milani dhe do ta fusja në skuadrën e Interit për të zëvendësuar Icardi. Pipita është një kampion i madh.“-komentoi “FantAntonio”.
Dy bomberat argjentinas mund të ndryshojnë fanellë në fundin e sezonit aktual, pa përjashtuar merkaton e këtij dimri, pasi kërkohen nga skuadrat më të mëdha të momentit, si Real Madrid, Barcelona, Manchester United dhe Juventus (Mauro Icardi) dhe Chelsea për Gonzalo Higuain.
