Milan ka marrë një fitore shumë të rëndësishme 3-1 me përmbysje në fushën e Atalanta-s, një rival direkt në luftën për një vend në Champions League dhe e ka arritur atë falë Krzysztof Piatek.
Polaku vazhdon të shkëlqejë në Serinë A dhe me fanellën e kuqezinjve. Ai ka shënuar katër gola në katër ndeshjet e para të luajtura me kuqezinjtë në kampionat dhe gjashtë në total në pesë ndeshje me “Djallin”, duke llogaritur edhe dygolëshin e realizuar kundër Napoli-t në Kupën e Italisë.
Gjithashtu, ai është ngjitur në vendin e dytë të renditjes së golashënuesve të Serisë A në këtë sezon me 17 realizime, dy më pak se Cristiano Ronaldo. Piatek është bërë edhe lojtari i parë që shënon tre gola në tri ndeshjet e para si titullar me Milan-in në kampionatin italian pas Mario Balotelli-t në shkurtin e 2013-ës.
Kanë qenë vendasit që kanë shënuar të parët me Freuler (33′), por miqtë kanë reaguar në fundin e pjesës së parë me një gol spektakolar të Piatek (45+1′), i cili ka befasuar Gjimshitin që po e mbulonte dhe Berishën në portë.
Në pjesën e dytë ka ardhur shpërthimi i skuadrës së Gattuso-s, që ka shënuar dy gola të tjerë në harkun e gjashtë minutave. Një predhë e Calhanoglu (55′) i ka dhuruar avantazhin milanezëve, ndërsa Piatek (61′) ka mbyllur takimin me një goditje të bukur me kokë.
Kështu, Milan ka arritur të mbrojë vendin e katërt dhe ka larguar Atalanta-n, që mbetet në vendin e pestë me 38 pikë, katër më pak se kuqezinjtë.
