Eintracht Frankfurt ka patur një sezon solid këtë vit duke shënuar 60 gola në 31 ndeshje, me kombinimin e Luka Jovic dhe Sebastien Haller që kanë dhënë kontribut të jashtëzakonshëm për skuadrën gjermane.
Sot, shorti i Europa League i vendosi përballë Interit. Jo më kot Frankfurt u cilësua një skuadër e fortë për Inter, pasi gjermanët arritën të kalojnë grupin me pikë të plota, duke dominuar të gjithë kundërshtarët, ashtu siç bëri ndaj Shakhtar Donetsk në fazën e mëparshme.
Dyshja Jovic-Haller kanë shënuar dhe asistuar në 52 raste nga 60 golat e shënuar. Jovic mban firmën e 20 golave dhe 5 asistve, ndërsa Haller ka tundur rrjetën në 16 raste dhe ka asistuar në 11 të tjera.
Në media ka qarkulluar informacioni se Jovic ka arritur marrëveshjen me Barcelonën dhe në fund të sezonit do kalojë në Spanjë, por këtë sezon sulmuesi serb nuk di të ndalet së shënuari dhe ndërkohë klubet që e kërkojnë sa vijnë e shtohen.
