Luka Modric do ta rinovojë kontratën me Real Madridin, sipas “Marca”. Kroati ka arritur marrëveshje me klubin për të vazhduar në “Santiago Bernabeu” deri në fund të sezonit 2020-2021, mes raporteve të shumta mediatike se dëshironte të largohej nga “Los Blancos”. Interi është parë si klubi më i interesuar për të nënshkruar mesfushorin nënkampion bote.
Ky i fundit e ka ndarë mendjen tashmë dhe ka pranuar të jetë pjesë e gjigantëve të La Liga-s deri më 30 qershor 2021. Kësisoji, “Los Blancos” i kanë siguruar shërbimet e fituesit të “Topit të Artë” deri në moshën 36-vjeçare. Kroati u bashkua me Real Madridin në verën e vitit 2012, nën drejtimin e Jose Mourinhos, duke ardhur nga Tottenham, pas bisedimeve intensive dhe të vështira me presidentin Daniel Levy.
Ai mori disa kohë për t’u përshtatur me dinamikën e ekipit të ri, por në sezonin e dytë u bë pikë referimi për “Los Blancos”, të cilët e kanë zgjeruar bastin mbi të, duke ia ronovuar kontratën. Në këtë vendim ka ndikuar atjetër pika e lartë e karrierës së Modric, i cili meritoi të gjitha llojet e vlerësimeve dhe çmimeve ndërkombëtare në vitin e kaluar.
Ai zbriti nga froni i “Topit të Artë” Lionel Messin dhe Cristiano Ronaldon, pas 10 vitesh dominim absolut në këtë trofe prestigjioz individual. Po ashtu, kroati u shpall “The Best” i FIFA-s dhe i UEFA-s. Hierarkia e klubit të bardhë e ka kuptuar atë që Modric përfaqëson dhe rëndësinë e tij për skuadrën aktuale të Realit, ndaj zgjodhi ta shpërblejë me një marrëveshje të re. Ëndrra e lojtarit dhe e klubit është që të tërhiqet si profesionist në “Santiago Bernabeu”.