Paratë nuk janë gjithçka dhe një klub si PSG, me një buxhet të madh në dispozoicion, nuk ishte në gjendje të realizonte objektivat që kishte në merkaton e janarit. Aq sa trajnerit Thomas Tuchel të mbesë i pakënaqur nga puna e drejtuesve, që nuk ishin në gjendje të sillnin në Paris lojtarët që ai dëshironte. Këtë gjë e ka shprehur vetë trajneri në konferencën e shtypit, në prag të ndeshjes që PSG do të luajë ndaj Lyon, ditën e diel.
“Unë jam i kënaqur që të paktën erdhi një mesfushor, Paredes. Nëse do të më pyesni në jam i kënaqur me merkaton e janarit, atëherë përgjigjja ime është JO. Gjithsesi, nuk jam i inatosur, pasi merkato e janarit është gjithnjë e komplikuar, pasi askush nuk ka dëshirë të shesë. Kishim disa mundësi, por nuk mundëm të afrojmë lojtarët që dëshironim. Kur është e vështirë të ndërtosh një ekip të fortë në verë, imagjinoni në janar”, tha Tuchel.
Duke parë këtë shterpësi në merkato dhe faktin se PSG nuk ka shumë mesfushorë, u përfol se Tuchel ka kërkuar që Adrien Rabiot të rikthehet në skuadën e parë, pas penalizimit për t’u stërvitur me ekipin B. Trajneri mohon gjithçka: “Nuk është e vërtetë që i kam kërkuar klubit që Rabiot t’i bashkohet ekipit. Situata është ajo e muajve të fundit. Ai është i pezulluar dhe unë e kuptoj dhe pranoj vendimin e klubit. Asgjë nuk ka ndryshuar”, tha Tuchel.