Nuk kanë fund telashet për sulmuesin e Interit, Mauro Ikardi. Pas ftohjes me klubin zikaltër, 26-vjeçari është lënë jashtë dhe nga ekipi kombëtar. Sipas “TyC Sports”, trajneri i Argjentinës, Lionel Skaloni, ka vendosur të mos e grumbullojë Ikardin për 2 miqësoret e muajit mars ndaj Venezuelës dhe Marokut.
Sulmuesi zikaltër nuk luan me Interin që prej datës 9 shkurt dhe kjo mund të jetë një nga arsyet që ka shtyrë trajnerin Skaloni që ta lerë jashtë. Ikardi pretendon se është i dëmtuar, por situata e krijuar së fundmi lë të kuptohet se nuk bëhet fjalë vetëm për një dëmtim, por për një krisje mes palëve.