Nuk kishte si të ndodhte ndryshe. Lajmi për heqjen e shiritit të kapitenit nga krahu i Mauro Ikardit dhe mos përfshirja e tij në skuadër për ndeshjen kundër Rapidit të Vienës në Ligën e Europës ka pushtuar faqet e para të mediave italiane, ndërsa është bërë objekt i humorit dhe talljes nga tifozët në rrjetet sociale. Fansat e Intert dhe jo vetëm ironizojnë me sulmuesin argjentinas, bashkëshorten-agjente të tij Uanda Nara dhe drejtuesit e klubit zikaltër.
Nga ana tjetër, të përditëshmet italiane mundohen të kuptojnë arsyet e vërteta të vendimit që tronditi botën e Interit. Titujt kryesorë lenë shumë pak vend për interpretime, ndërsa ndjehen qartë notat negative në fjalët e përdorura.
Po ashtu, duke qëndruar në atë që raportojnë mediat përtej Adriatikut, linja e ashpër e ndjektur nga drejtori i ri i klubit, Xhuzepe Marota e bën të sigurt largimin e sulmuesit argjentinas në fund të sezonit.
