Atletico Madrid është kthyer te fitorja në La Liga pas dy humbjeve radhazi të pësuara kundër Betis dhe rivalëve të Real Madrid.
Skuadra e Diego Simeone-s, i cili rinovoi para dy ditësh kontratën e tij me bardhekuqtë deri në 2022-shin, kanë mposhtur 1-0 Rayo Vallecano-n në transfertë.
Goli që ka vendosur takimin është realizuar në Antoine Griezmann në minutën e 74-t. Francezi ka marrë një pasim në zonë nga Morata dhe e ka shfrytëzuar në mënyrën e duhur, edhe falë një devijimi.
Kjo ka qenë ndeshja e gjashtë radhazi me gol për Griezman në takimet e luajtura kundër Rayo Vallecano-s në të gjitha kompeticionet (tetë gola në total).
Falë tri pikëve të marra sot, “Colchoneros” kanë parakaluar Real Madrid-in në renditje dhe janë ngjitur përkohësisht në vendin e dytë. “Los Blancos” do të kenë mundësinë të kundërpërgjigjen nesër në takimin që do të luajnë në shtëpi kundër Girona-s.