John Terry dha mendimin e tij për refuzimin e portierit Kepa, që të zëvendësohej në finalen e “Carabao Cup”. Ish-mbrojtësi dhe kapiteni i Chelsea, një legjendë e kësaj skuadre, nuk e ka kapërdirë dot këtë veprim të spanjollit. Madje, nënvizon se trajneri Maurizio Sarri është gjendur në një situatë delikate, pas episodit.
“Ai e la Sarrin në një pozicion të vështirë, e injoroi. Jam i habitur se si trajneri nuk e detyroi atë të zëvendësohej, – tha Terry për “Sky Sports”. – Do të jetë interesante të shoh se si do të zgjidhet kjo situatë në 24 orët e ardhshme. Po të isha në dhomën e zhveshjes, do të prisja që trajneri të hynte aty dhe do të shpërtheja ndaj portierit”.