Inter ka fituar 2-1 ndaj Sampdoria-s në San Siro, duke u shkëputur përsëri ndaj Milan-it që ishte afruar vetëm një pikë në renditje.
Ishte një ndeshje argëtuese pasditen e së dielës në Milano dhe zikaltrit e kanë merituar plotësisht fitoren.
Pas një pjese të parë të ekuilibruar, vendasit morën frenat e lojës në dorë duke ushtruar presion mbytës ndaj kundërshtarëve.
Inter shpërdoroi disa mundësi të mira përpara se të shënonte golin e avantazhit me D’Ambrosio.
Megjithatë, Samp barazon menjëherë me Gabbiadini, i cili shfrytëzoi më së miri një gatë të prapavijës vendase.
Pak minuta më pas erdhi goditja fantastike e Radja Nainggolan nga distanca që i dha tre pikët Inter-it.
Në stadium ishte edhe Icardi, i cili është parë duke festuar golat e shënuar nga shokët e ekipit.
