Mbrojtësi i Leicester dhe kombëtares angleze Harry Maguire nuk është në shitje. Sipas të përditshmes “Leicester Mercury”, çdo ofertë që do të vijë në adresë të mbrojtësit 26-vjeçar do të kthehet mbrapsht. Kjo prish shumë planet e trajnerit Solskjaer, që e dëshiron me çdo kusht lojtarin.
Drejtuesit e klubit të Leicester kanë bërë me dije se lojtari do të luajë të paktën edhe një sezon me “dhelprat” dhe më pas do të lihet i lirë. Kjo deklaratë ka “zënë mat” skuadrën e Manchester United, që prej muajsh synon të sjellë në “Old Trafford” mbojtësin e talentuar.
Harry Maguire është objektivi kryesor i “djajve” për repartin e mbrojtjes, por ky transferim tashmë bëhet i vështirë, duke parë se Leicester nuk synon ta shesë. Manchester United ka ofruar deri në 60 milionë stërlina për lojtarin, por deri më tani gjithnjë ka dështuar.
