Asgjë e re në lidhje me të ardhmen e sulmuesit argjentinas Mauro Icardi, që vijon duelon me klubin. Ai që qëndron në mes të dy llogoreve është trajneri Luciano Spalletti, që ashtu si sulmuesi nuk e ka aspak të sigurtë qëndrimin tek Interi sezonin tjetër. Zikaltërit kanë zbritur në vendin e katërt në renditje dhe rrezikojnë shumë.
Trajneri Spalletti përpiqet të ruajë ekuilibrat për të evituar kapitullimin që tani, ndaj ka vendosur të mbajë anën e klubit në lidhje me çështjen “Icardi”. Ai u shpreh se do të jetë klubi ai që do të vendosë për të ardhmen e sulmuesit edhe pse shpreson ta ketë sërish në dispozicion në pjesën e mbetur të sezonit.
“Nuk kam folur me Icardi, por kjo është një çështje e klubit dhe unë do të respektoj vendimin që do të marrë ai. Shpresoj që situata të zgjidhet për mirë sa më shpejt, pasi kështu penalizohemi të gjithë”, u shpreh Spalletti. Ai po përgatit Interin për ndeshjen e radhës në Europa League, ku zikaltërit do të luajnë ndaj Eintracht Frankfurt.
