Manchester United e zyrtarizoi sot kontratën 3-vjeçare me trajnerin Ole Gunnar Solskjaer. Nuk ka vonuar dhe në mbështetje të këtij vendimi ka dalë një legjendë e këtij klubi, Gary Neville. Ky i fundit, gjithsesi, ka shkuar më tej, duke nënvizuar se nevojiten shpenzime në merkaton e verës, për t’i dhënë kuptim (dhe produkt) bashkëpunimit të përhershëm me norvegjezin.
Ish-mbrojtësi i “Djajve të Kuq” reagoi në Twitter, pasi ish-shoku i tij i skuadrës u “votëbesua” sot nga klubi: “Unë jam i kënaqur për Olein. Nuk mendoja se kjo do të ndodhte, kur zëvendësoi Mourinho. Megjithatë, rezultatet dhe shpirti i grupit kanë qenë në nivele të pabesueshme, që kur ai arriti këtu. Prandaj, e meriton këtë kontratë. Tani, Solskjaer ka nevojë për mbështetje në merkaton e transferimeve, në aspektin e burimeve të duhura financiare”.