Nga Parisi në Torino. Festimet e Patrice Evra në të dyja rastet, si në golin e tretë të Manchester United në “Parce des Princes, javën e kaluar, edhe i treti i Ronaldos mbrëmë, ndaj Atletico Madridit, janë të zjarrta, unike dhe kanë bërë xhiron e botës.
Nga futbollist i fushës së blertë me këto dy skuadra, francezi është kthyer në një ultras i vërtetë i tyre. Ish-mbrojtësi i kombëtares franceze u rikthye përsëri mbrëmë në qendër të vëmendjes, teksa u nis drejt Italisë me shpresën për të shijuar përmbysjen e konsideruar të pamundur të bardhezinjve.
Sigurisht, ai e festoi bashkë me tifozët kualifikimin e Juventusit në çerekfinale të Champions-it, falë fitores mahnitëse 3-0 në kthim, ndaj Atletico Madridit. Goli i tretë i Ronaldos ndezi festën e madhe në shkallët e “Allianz”, gjë që u filmua dhe u hodh në Instagram nga ish-futbollisti bardhezi, shoqëruar me statusin e shkurtër në italisht: Natën e mirë!
