Karriera e Zinedine Zidane është e lakmueshme nga shumë njerëz, si koha kur ishte futbollist edhe tani që është në rrugën e suksesit si trajner.
Gjithsesi francezi në një intervistë ndryshe ka rrëfyer vuajtjet e tij derisa kapi suksesin, “Që të luaje më parë, duhet të ishte i zoti. Nuk është e thjeshtë si tani. Nëse tani ke pak talent ta japin menjëherë mundësinë”, tha Zidane.
Trajneri i Real Madrid tregoi vështirësitë në hapat e parë drejt futbollit duke u shprehur kështu: “Dëshira ime e vetme ishte të bëhesha futbollist, por unë kisha probleme në shkollë. Prindërit e mi kurrë nuk më qortuan mua, por ata e dinin se sjellja ime nuk ishte ideale. Kështu një ditë ata më thanë: ‘E dimë që ke diçka në mendje, prandaj bëj atë që do’. Sapo mora lejen e mamit dhe babit, menjëherë e dija se çfarë doja. Kur shkova te Cannes dhe pashë lojtarët duke u stërvitur thashë: Dua t’i përkushtohem vetëm kësaj.”
Zidane e pati të qartë atë që donte dhe luftoi me forcë e shpirt për t’u bërë më i mirë në botë.
“Që nga ai moment luftova për t’u bërë më i miri. Pushoja mirë, nuk bëja budallallëqet që bëja nëpër bare, pija ujë dhe stërvitesha shumë. Dhashë gjithçka për t’u bërë lojtari më i mirë, duhet ta bëjë atë me çdo kusht. Vetëm kështu do t’i bëja të lumtur dhe krenarë prindërit e mi”, zbuloi më tej francezi.
Ndër të tjera 46-vjeçari krahasoi vështirësitë e futbollit në ditët e sotme me asokohe, “Në atë kohë, për të vënë veten në dukje duhet të ishe i mirë, jo si sot. Fillimisht duhet të tregoje se je ndryshe nga të tjerët sepse ishte një numër i limituar vendesh për lojtarët e rinj, vetëm një ose dy mund të ishin pjesë e skuadrës. Sot jo. Sot, gjithçka ka ndryshuar dhe gjithçka po lëviz me ritme të shpejta dhe lojtarët nuk kanë frikë të bëjnë gabime.”
