Andres Iniesta, aktualisht futbollist i Vissel Kobe, është një nga protagonistët më të mëdhenj të numrit të fundit të revistës “Panenka”. Ish-kapiteni i Barcelonës do të fillojë sezonin e tij të dytë në futbollin japonez. Lidhur me përshtatjen në kampionatin e këtij vendi aziatik, Iniesta pohon: “Tani jam më i adaptuar me të gjitha gjërat, si në jetën e përditshme, edhe në aspektin sportiv. Brenda vetes ndihem më mirë dhe shumë i qetë. Fillimi nuk ka qenë i lehtë për mua këtu. Çdo ndryshim gjeneron stres”.
Dy fjalë për të ardhmen, trajner apo president i Barcelonës: “Nuk mund të zgjedh tani, sepse ende po luaj futboll, por rolin e trajnerit e shoh si alternativë në të ardhmen. Presidencën nuk e mendoj. Më shumë e shoh veten si një komentator, sesa president i Barçës“.
Duke iu referuar një niveli tjetër futbolli në Japoni, ndryshe nga La Liga, ish-mesfushori katalanas shtoi: “Këtu kam gjetur një tjetër klub, shokë të tjerë, stadiume të tjera, lloje të tjerë rivalësh… Të gjitha ndikojnë, por niveli i futbollit këtu është i mirë. Po e shijoj si eksperiencë. Në përgjithësi, futbolli në Japoni është shumë i shpejtë, mjaft fizik, ka pak pauza. Praktikisht, futbollisti japonez është i shpejtë, i zgjuar, i aftë dhe shumë dinamik. Kjo është diçka, që unë e doja. Niveli i kampionatit këtu më befasoi për mirë“.
Natyrshëm pyetet edhe për ish-skuadrën e tij të zemrës, a e ndjek atë përmes televizorit. Andres përgjigjet: “Me ndryshimin e orari këtu është praktikisht e pamundur për t’i parë ndeshjet e Barcelonës. Mund ta bëj këtë vetëm nëse rri pa fjetur. E mbështes nga larg Barcelonën, si një tifoz i saj. Mendoj se është duke bërë shumë mirë”.
A do t’i pëlqente një përballje me ish-skuadrën e tij? “Natyrisht, të luash kundër saj është diçka e veçantë për çdo futbollist, por mua nuk do të më pëlqente të konkuroja drejtpërdrejt me Barcelonën, në kuptimin e të garuarit brenda kampionatit spanjoll, ose në Europë. Çdo gjë tjetër do të ishte e mirë”, – përfundon gjeniu i mesfushës.
