Të enjten pasdite Florentino Perez është ulur të flasë sërish me Sergio Ramos, pas debatit të tyre të parë, ku mbrojtësi i ka lënë të kuptohet se mund të largohet nëse e paguan atë.
Palët kanë ulur tensionin e krijuar pas eliminimit nga Champions League në atë humbje turpëruese ndaj Ajax në “Bernabeu”. Ramos ka vendosur të lërë mënjanë inatin që ka me Perez dhe do të marrë rolin e liderit të skuadrës për ta mbyllur me nder deri në fund të sezonit.
Marrëdhënia mes tyre është sërish e akullt, për faktin e thjeshtë se Ramos nuk e ka kapërdirë të gjithë atë mllef që Perez ka shprehur pas ndeshjes me Ajax, pikërisht ndaj disa lojtarëve që i kanë dhënë gjithçka në 5 vitet e fundit, 1 La Liga, 1 Kupë dhe 4 Champions League.
Ndër të tjera kapiteni spanjoll ka organizuar një mbledhje me të gjithë shokët e skuadrës, pa praninë e stafit drejtues dhe stafit të trajnerëve, të cilëve ia ka kërkuar angazhim maksimal për ndeshjet në vijim, më shumë një zotim për të mos e njollosur më emrin e Real Madridit.
