Jose Mourinho ka mbrojtur trajnerin italian Maurizio Sarri, që është vënë në qendër të kritikave javët e fundit te skuadra e Chelsea për rezultatet zhgënjyese. Ish-trajneri i Napolit është në sezonin e tij të parë në Premier League dhe ambientimi i tij me këtë kampionat është problemi i tij më i madh. I këtij mendimi është Mourinho, që tha: “Sarri është një trajner me 20 vite përvojë, ndaj në Premier ka ardhur një trajner gati për këtë aventurë”, shprehet portugezi.
“Ky është vetëm sezoni i tij i parë dhe vështirësia e tij më e madhe aktualisht është të përshtasë stilin e tij të lojës, ashtu siç pati bërë te Napoli. Premier League është një kampionat ku ndonjëherë duhet të dalësh nga identiteti yt, nga karakteristikat e tua të lojës, për t’u adaptuar me ato të kundërshtarit”, tha Jose Mourinho.
Më tej trajneri portugez i jep një këshillë Sarrit: “Maurizio duhet të kuptojë sa më shpejt filozofinë e lojës në Angli dhe më pas do të jetë i suksesshëm. Nëse qëndron te Chelsea edhe sezonin tjetër do të jetë më i përgatitur në këtë drejtim dhe do të triumfojë më kollaj me skuadrën që ka. Vitin tjetër mund të fitojë titullin”, u shpreh Mourinho.
