Klubet më të mëdhenj të futbollit e kanë kthyer në modë ndryshimin e fanellës çdo sezon, duke bërë ndonjë ndryshim herë të vogël e herë madhor, me synimin për të shitur sa më shumë fanella, duke qenë se tifozët duan gjithnjë të kenë fanellën e sezonit aktual.
Edhe Juventusi ndjek rrymën dhe sipas traditës, fanella e ardhshme fillimisht është zbuluar si pa dashje nga “rrjedhje sekreti” në internet. Një mënyrë e mirë për të testuar edhe tifozët, sepse në bazë të reagimit të tyre vendoset më pas nëse fanella e re do të hidhet në treg.Megjithatë, bazuar te reagimet e tifozëve bardhezinj, Juve bën mirë të ndryshojë plane, sepse fanella e ardhshme është e shëmtuar dhe pa asnjë lidhje me traditën.
Ndryshe nga fanella historike me vija bardhezi, Juve po mendon të kalojë te fanella e ndarë në dy pjesë, me Adidas që po punon për një dizajn pa precedent, me fanellën të ndarë në dy pjesë, njëra e bardhë dhe tjetra e zezë, por me një vijë rozë për t’i ndarë. Ndërkohë, nga pas fanella do të jetë thuajse tërësisht e zezë.
Pikërisht këto ndryshime kanë tërbuar shumë tifozë, që pak a shumë e kanë dhënë mendimin e tyre, duke e quajtur “të shëmtuar”, “absurde” dhe “të pështirë” fanellën e re, nëse do të zyrtarizohet.
