Lojtarë të mirë ka shumë, por kampioni duket kur ndeshjet janë vendimtare. Kampioni i vërtetë është ai që jep 100% në ndeshjet ‘normale’, por që arrin të japë 120%/130% në takimet e rëndësishme. Një nga këta është Cristiano Ronaldo.
Këtë e tregojnë statistikat: CR7 është i papërmbajtshëm, por me golin e shënuar në fushën e Ajax-it ka konfirmuar se është golashënuesi më i mirë në fazën me eliminim direkt të Champions League. Numri i golave të tij nuk mund të arrihet as duke mbledhur ato të shënuar nga vendi i dytë dhe i tretë në këtë renditje.
Shifrat janë të pakundërshtueshme. Golat e shënuar nga portugezi nga çerekfinalet e Champions League e në vazhdim janë 41. Në këtë renditje, ai ndiqet nga Messi me 16 realizime, Inzaghi, Raul dhe Shevchenko me 13. Nga ana tjetër, CR7 e ka fituar 7 herë titullin e golashënuesit më të mirë të kompeticionit më të rëndësishëm europian për klube.
Sigurisht, goli kundër Ajax-it ka ardhur në çerekfinale, por nuk duhet harruar faza e 1/8-ave. Duke marrë në konsideratë të gjithë fazën me eliminim direkt të Champions League, numri i golave të CR7 rritet ndjeshëm dhe shkon në 64. Si gjithmonë, pas tij vjen Messi me 42, i ndjekur nga Muller me 21.
As duke mbledhur golat e argjentinasit dhe gjermanit nuk do të arrihej shifra e frikshme e Ronaldo-s. Juventus e ka marrë për të fituar Champions League dhe ai po tregon se është një garanci e vërtetë në këtë aspekt.
