Tottenham fitoi, por mori një goditje të rëndë në çerekfinalen e parë të Ligës së Kampionëve kundër Manchester City. Harry Kane u largua nga fusha i dëmtuar, i mbështetur në supet e stafit mjekësor, ndërsa e la stadiumin me paterica.
Në fillim të pjesës së dytë, kyçi i këmbës së sulmuesit anglez mori një goditje, pas përplasjes me Delph. Aq shumë dhimbje pati, sa menjëherë u largua nga fusha, pa i dhënë kohë trajnerit Pochettino të vazhdonte me zëvendësimin.
Dyshimet e para janë për një dëmtim serioz të Kane, por për të mësuar më qartë situatën reale do të duhet të presim. Kapiteni i Anglisë e la fushën pa e zënë njërën këmbë në tokë.
Në fund të ndeshjes, trajneri i Tottenham nuk dukej aspak optimist për lëndimin e yllit të vet. Ai pranoi “ferr-parajsën” e mbrëmjes: “Jam i lumtur për fitoren, por gjithsesi mbetet një natë e trishtuar. Kane ndrydhi kaviljen, mori goditje në të njëjtin vend, që e kishte dëmtuar kohë më parë. Shpresojmë se do të jetë më pak serioz si dëmtim, por ka gjasa që ta humbasim për pjesën tjetër të sezonit”.
