Fakti që Mario Manxukiç tashmë po bën gati 3 muaj që stërvitet me një trajner personal dhe jo me pjesën tjetër të Juventusit duket se ka ftohur disi bindjen e Mançester Junajtidit se kroati mund të jetë lojtari i duhur për ta afruar në merkaton e verës dhe për të forcuar repartin ofensiv.
Ndonëse për 3 muaj me radhë tashmë po përflitet për një akord të arritur, madje me anglezët që e kanë rritur ofertën e tyre nga 11 në 13 milionë sterlina (14.5 milionë euro), sipas burimeve të “Daily Mail”, Manxukiç ka fare pak mundësi që të transferohet në “Old Trafford” në janar.
“Djajtë e kuq” duken të profilizuar dhe gati për të shpenzuar edhe dy herë më shumë para për të provuar të arrijnë tek Edin Xheko, gjiganti boshnjak i Romës, i cili, ndryshe nga vjet, këtë sezon e ka nisur me një ritëm shumë të mirë kampionatin dhe duket se është lojtari që trajneri Solskjaer ka zgjedhur, duke vendosur të tradhtojë juventinin Mario Manxukiç.
