Pasi e eliminoi nga Kupa e Shqipërisë, Luftëtari ka mposhtur sërish Partizanin me rezultatin 1-3 në sfidën e zhvilluar në “Selman Stërmasi” të vlefshme për javën e 27-të të Kategorisë Superiore.
Të kuqtë kaluan të parët në avantazh me anë të Dukës, në minutën e 3-të, teksa gjuajtja e mesfushorit në hyrje të zonës, u devijua nga Asani.
Edhe pse ky i fundit ishte në pozicion të parregullt, për gjyqtarin anësor, goli vlen. Kur u mendua se gjithçka do të ishte e lehtë të kryesuesit në fuqi, Dunga i shtang të gjithë me dopietën e realizuar në minutat 38-të dhe 44-t.
Sulmuesi kenian nuk u mjaftua me dygolëshin e realizuar, teksa në minutën e 74-t, vulosi takimin me një gol “alla Ibrahimoviç”. Me triumfin e sotëm, Luftëtari ngjitet në kuotën e 34 pikëve, duke thelluar diferencën në +4 nga Tirana e vendit të 8-të dhe +7 nga Kastrioti i vendit të parafundit. Ndërkohë Partizani udhëheq i vetëm me po të njëjtën diferencë nga Kukësi i vendit të dytë.
