Zinedine Zidane tha se humbja e parë e Real Madridit, që nga kthimi i tij si trajner, mund të shpjegohet kryesisht me mungesën e motivimit të lojtarëve. Të bardhët u mposhtën 2-1 nga Valencia, të mërkurën, pasi i kishin fituar dy ndeshjet e mëparshme me francezin në krye.
Tashmë, Real Madridi e sheh veten plot 13 pikë prapa liderit të La Liga-s (Barcelona). “Duhet ta përfundojmë sezonin në mënyrën më të mirë të mundshme, – tha Zidane, në konferencë shtypi. – Ne do t’i shfrytëzojmë këto muaj duke folur për shumë tema të ndryshme, por jo për ndonjë objektiv. Është e vërtetë se, ndoshta në këto lojëra na mungon motivimi.
Sidoqoftë, këto lojtarë janë profesionistë dhe, kur e veshin fanellën e Realit, e dinë se çfarë duhet të bëjnë. Kjo ndeshje nuk është fare provim. Ne po kalojmë një moment të komplikuar, mund të përjetojmë edhe momente të tilla të këqija”.
