Mesfushori i Crystal Palace, Wilfried Zaha, ka treguar në një intervistë për “Daily Mail” tmerret e kaluara te Manchester United me trajnerin David Moyes, i cili zëvendësoi Sir Alex Ferguson në vitin 2013. 26-vjeçari pranon se ka pasur një trajtim armiqësor në “Old Trafford”, gjë që e ka privuar nga mundësia e madhe e karrierës.
Një “ferr”, që e kujton gjashtë vite më vonë, kur ka vendosur të hedhë një hap të madh, që nuk mundi ta realizonte atëherë, në karrierën e tij. Sulmuesi ka në plan të largohet nga klubi aktual dhe të nënshkruajë me dikë tjetër, me të cilin mund të luajë në Champions, çka është edhe qëllimi i tij i madh.
“Manchester United u përpoq ta shkatërronte karrierën time”. Me këtë fjali, Zaha fillon të tregojë se çfarë i ndodhi atë vit. Trajner i “Djajve të Kuq” ishte ende Sir Alex Ferguson, i cili e bleu lojtarin e lindur në Bregun e Fildishtë, por që jetonte në Angli prej fëmijërisë. Me pasardhësin e skocezit, David Moyes, çdo gjë ndryshoi për keq me të.
Zaha thotë se u përpoq ta fitonte me meritë vendin në ekip, madje iu lut Moyes për t’ia dhënë një shans, që të tregonte veten, por ish-trajneri e përçmoi deri për ngjyrën e tij. Madje, ai thotë se ishte viktimë e thashethemeve, që sugjeronin se shkonte me vajzën e Moyes. Në këtë pikë ndihet tepër i zhgënjyer, sepse klubi kurrë nuk doli t’i mohonte ato zëra.
“Kur më la jashtë grupit të Ligës së Kampionëve dhe mori Adnan Januzaj, i cili nuk kishte luajtur kurrë në ekipin e parë, e kuptova se situata ishte shumë më serioze nga sa mendoja. Trajneri kishte shkuar shumë përtej arsyeve të futbollit. Nuk ishte punë aftësish në futboll, çfarë mund të bëja atëherë”, – shpjegon Zaha, ende i lënduar.
Ai ishte lojtari i spikatur te Manchester United në sezonin 2013-2014, por shton se në mënyrë të pashpjegueshme u hoq nga ekipi i parë prej Moyes deri në fund të tetorit. Në janar 2014 u huazua te Cardiff City. “Atje, isha tashmë hija e vetvetes”, – pranon sulmuesi me hidhërim.
Po atë vit, ai u kthye te Crystal Palace, klubi i tanishëm. Një e kaluar shumë e vuajtur, që frymëzon ambicien e Zaha për të luftuar dhe arritur diçka në karrierë: “Futbolli ka ndryshuar jetën time dhe të familjes. Kur kam nënshkruar për Crystal Palace, ende nuk kishim asgjë në shtëpi. Nuk mund të përballoja dot as çmimet e këpucëve të futbollit, m’i jepnin miqtë e mi.
Futbolli, në njëfarë mënyre, me të vërtetë e shpëtoi jetën tonë. Kemi ardhur nga askundi, kam vuajtur shumë për të arritur këtu ku jam sot. Megjithatë, nuk do të ndalem këtu, jam shumë ambicioz”.
