Kanë mbetur katër skuadrat e fundit: Dy angleze (Liverpuli dhe Totenhemi), një spanjolle (Barcelona) dhe një holandeze (Ajaksi i Amsterdamit).
Barcelona, Liverpuli, Ajaksi dhe Totenhemi premtojnë spektakël në 180 minutat e gjysmëfinaleve të Ligës së Kampionëve. Më shumë se gjithë të tjerët premtojnë katalanasit.
Dhe po e nisim me golat e shënuar: ata kanë realizuar deri në këtë fazë të Champions-it 23 gola, duke u konfirmuar sulmi më i fortë (Mesi kryeson listën e golashënuesve të kompeticionit me 10 gola dhe 3 asiste). Katalanasit prodhojnë edhe më shumë në këtë fazë, ku kanë regjistruar 71 goditje në kuadrat, edhe pse jo gjithmonë marrin më të mirën. 
Por Ernesto Valverde krenohet edhe me repartin e mbrojtjes. Barcelona ka pësuar vetëm 6 gola deri tani, më pak se çdo gjysmëfinaliste tjetër. Edhe te zotërimi i topit, ata janë sërish kampionë (e mbajnë topin 63.35 % mesatarisht për ndeshje), ashtu siç janë të pakonkurrueshëm edhe në fushën e pasimeve dhe saktësinë e tyre: 7012 në total, saktësia e të cilave ka qenë 89.02%.
E vetmja kategori ku spanjollët humbasin në përballjen direkte të statistikave, është saktësia e goditjeve (përjashtuar ato të bllokuara): 50.4%. Shënjestrën më të mirë e ka skuadra e Totenhemit, e cila e gjen kuadratin e kundërshtarit në 56.7% të rasteve.
