Neymar, që është gjithmonë i përfshirë në aludimet mbi një rikthim të mundshëm te Barcelona, ose për një transferim te Real Madrid, mbrëmjen e të shtunës festoi performancën fantastike të Messit dhe Luis Suarez në fitoren 2-0 ndaj Atletico Madrid.
Një fitore kjo që afron katalanasit shumë pranë titullit kampion në La Liga, me skuarën e Simeones që tashmë është 11 pikë pas ekipit blaugrana.
Ishte Luis Suarez, ai që pas ndeshjes postoi në Instagram një foto të tijën përkrah argjentinasit Messi duke festuar 3 pikët e arta, shoqëruar me diçiturën: “VAMOSSSSS. Ekip madhështor”, duke shtuar edhe emoy.
Pikërisht mbi këtë foto mbërriti edhe komenti i Neymar: “grandes” (gjigantë) të shoqëruar me zemër dhe duartrokitje. Një mesazh i qartë ky i brazilianit për shokët e ngushtë dhe ish-ekipin e tij.
Për pasojë, të shumtë ishin ndjekësit e Luis Suárez në rrjetin social që reaguan ndaj komentit të Neymar duke i kërkuar të rikthehet Barcelona, sikurse dhe të tjerë që e sulmuan për transferimin te PSG.
