UEFA zbarkon në Vlorë. Për më shumë se 60 minuta, stadiumi “Flamurtari” ka qenë pjesë e një inspektimi ndërkombëtar. Pozicionimi në vendin e tretë e ka bërë Flamurtarin që të jetë favorit për të marrë pjesë në Kupat e Europës.
Por, për të marrë pjesë në këtë kompeticion, Flamurtari duhet të plotësojë disa kritere që lidhen me infrastrukturën, kritere këto të domosdoshme. Për të parë se si janë kushtet e impiantit dhe për të bërë licencimin e tij, mbërritën dje në Vlorë përfaqësues të UEFA-s, të shoqëruar nga përfaqësuesi i FSHF-së, shefi i sektorit të licencimeve, Eduard Gjini.
Fillimisht, përfaqësues të UEFAs dhe FSHF-së zhvilluan një takim në katin e dytë të klubit me drejtorin Ardi Behari. Në këtë takim ishin edhe drejtues të sigurisë në klub dhe kompanisë private. Pas një takimi që zgjati disa minuta, inspektorët e UESA-s dhe FIFA-s zbritën në terren.
Ata kanë parë me imtësi dhe në detaje çdo gjë. Pjesë e inspektimit është bërë fillimisht pjesa e jashtme përpara stadiumit. Inspektorët kanë realizuar foto në këtë territor, por edhe në të gjitha pjesët e tjera hyrëse për në stadium, si edhe daljet e tij. Me mjaft seriozitet janë parë portat hyrëse në tribuna, shkallët e tribunave, por edhe muret rrethuese.
Madje, ka qenë vetë inspektori i UEFA-s, që është ulur në tribunën e miqve dhe ka vëzhguar sikur të shikonte një ndeshje futbolli. Inspektorët kanë parë dhe kanë fotografuar edhe fushën, portat, e deri te pankinat.
DETYRAT– Inspektorët e UEFA-s kanë lënë disa detyra të cilat duhet që të plotësohen nga klubi vlonjat. Pjesa më e madhe e detyrave lidhet me sigurinë. Klubi duhet të ketë prioritet për të përmbushur sigurinë./ panorama sport
