Christian Eriksen është nën kontratë deri në vitin 2020 me Tottenham, por sirenat e largimit janë gjithmonë rreth tij. Ndërsa në Angli e kanë bërë të qartë se mesfushori e ka vendosur të ardhmen e tij.
Ka qenë e përditshmja “Daily Express” që ka shkruar se Eriksen e ka bërë zgjedhjen e tij mes Real Madridit dhe Manchester United që janë dy klubet më të interesuara për të.
Sipas burimeve të medies angleze, 23-vjeçari ka vendosur që e ardhmja e tij të jetë në Spanjë, tek Real Madridi.
Arsyeja është e thjeshtë, Eriksen dëshiron të fitojë Champions League sezonin e ardhshëm. Edhe klubi londinez do të preferonte ta shiste në Spanjë, në mënyrë që të mos përforcojë një ekip rival të tyrin.
Operacioni për kalimin e Eriksen në Madrid parashikohet të mbyllet për 100 milionë euro.
